რამდენი მილიონი ლარის შემოსავალი აქვს მაკდონალდს საქართველოს?

რამდენი მილიონი ლარის შემოსავალი აქვს "მაკდონალდს საქართველოს"?

дата: 1204

"მაკდონალდს საქართველომ" 2020 წლის ფინანსური ანგარიში გაასაჯაროვა. ანგარიშის თანახმად, გასულ წელს კომპანიის მთლიანმა შემოსავალმა 96 მილიონი ლარი შეადგინა, რაც 2019 წელთან შედარებით 3 მილიონი ლარით ნაკლები იყო. შემცირების ძირითადი მიზეზი ქვეყანაში არსებული პანდემიური ვითარება და უცხოელ ვიზიტორთა რაოდენობის 80%-იანი ვარდნა იყო.

საქართველოში “მაკდონალდსის” ქსელი 18 რესტორნით, ლოჯისტიკური ცენტრით და პურ-ფუნთუშეულის საწარმოთი არის წარმოდგენილი. ჯგუფი მთლიანობაში 1400-ზე მეტ ადამიანს ასაქმებს.

“2020 წელი გამოწვევა იყო ყველა ინდუსტრიისთვის, მაგრამ განსაკუთრებული სირთულეები შეიქმნა სარესტორნო ბიზნესისთვის, მიუხედავად კრიზისისა, "მაკდონალდსმა" თბილისში ორი ახალი ფილიალის გახსნა შეძლო.

გარდა ორი ახალი ფილიალისა კომპანიამ 2020 წელს პროდუქტის ხარისხის კიდევ უფრო გაუმჯობესების მიზნით, 26,000,000 ლარის ინვესტიციით პურ-ფუნთუშეულის საწარმო გახსნა. “მაკდონალდსი” საქართველოს ეკონომიკის ერთ-ერთი უმსხვილესი კონტრიბუტორია. 2019 წელს კომპანიამ ბიუჯეტში 19,980,000 ლარი შეიტანა, იმავე წელს ინვესტიციის ჯამურმა მოცულობამ 14,000,000 ლარი შეადგინა. 2020 წელს კი ორი ახალი რესტორნისთვის 19,000,000 ლარის ინვესტიცია განახორციელა,”- ნათქვამია კომპანიის მმართველობით ანგარიშში.

ანგარიშის მიხედვით, 2020 წელს “მაკდონალდსისთვის” ყველაზე მზარდ მიმართულებას ადგილზე მიტანის სერვისები წარმოადგენდა, სადაც 2019 წელთან შედარებით გაყიდვები 85%-მდე გაიზარდა.

"აღსანიშნავია, რომ 2020 წელს კორონა ვირუსით გამოწვეული ეკონომიკური მდგომარეობის და შეზღუდვების გამო, 2019 წელთან შედარებით მომხარებელთა რაოდენობა 20%-ით შემცირდა, ხოლო შემოსავალი მხოლოდ 2%-ით, რაც გამოწვეული საშუალო ჩეკის ზრდით დრაივისა და დელივერის არხებში, ასევე ორი ახალი ფილიალის გახსნით,"- ნათქვამია მმართველობით ანგარიშში.

“მაკდონალდსმა” გასულ წელს საკვები მასალების შესაძენად 47 მილიონი ლარის ხარჯი გასწია. კომპანიაში დასაქმებულთა ანაზღაურებისა და სხვა სარგებლის მოცულობა კი 16.2 მილიონ ლარს შეადგენდა. აუდიტირებული ფინანსური ანგარიშიდან ირკვევა, რომ “მაკდონალდსმა” 2020 წელს სარეკლამო მიმართულებაზე 3.4 მილიონი ლარი დახარჯა.

2018 წელს "მაკდონალდს საქართველომ“ სამომავლო განვითარებისთვის EBRD-სგან 20 მილიონი ევროს სესხი აიღო. კომპანიის სტრატეგიული განვითარების გეგმა, ორიენტირებულია მაქსიმალურად მოხდეს თბილისისა და საქართველოს საბაზრო არეალის დაფარვა, რათა მომხმარებლებისთვის უფრო ხელმისაწვდომი გახდეს კომპანიის მომსახურების მიღება. თუმცა, 2020 წელს ეროვნული ვალუტის გაუფასურების გამო, კომპანიის სავალუტო ვალდებულებების მოცულობა გაიზარდა, ამის გამო კომპანიისთვის საკურსო ზარალმა 19.5 მილიონი ლარი შეადგინა. აღნიშნულის გათვალისწინებით, გასულ წელს “მაკდონალდსი” საქართველოში მოგების ნაცვლად 19 მილიონი ლარის ზარალზე გავიდა.

“მაკდონალდს საქართველოს” აქტივები 149 მილიონ ლარს, გრძელვადიანი ვალდებულებები კი 97 მილიონ ლარს შეადგენს.

ფინანსური ანგარიშის თანახმად, კომპანიის 90%-იან წილს ბიზნესმენი თემურ ჭყონია ფლობს. კომპანიამ 2018 წელს “მაკდონალდსის” ლიცენზია კიდევ 20 წლით გაიხანგრძლივა.

პარიზის წიგნის ფესტივალზე საქართველოს მწერალთა სახლი ეროვნული სტენდით პირველად არის წარმოდგენილი

კულტურის სამინისტროს მხარდაჭერით 12-14 აპრილს საქართველოს მწერალთა სახლი 2024 წლის პარიზის წიგნის ფესტივალზე ეროვნული სტენდით პირველად მონაწილეობს.

Grand Palais Éphémère–ში ფესტივალისა და საქართველოს ეროვნული სტენდის გახსნას მწერალთა სახლის დირექტორი ქეთევან დუმბაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში გოჩა ჯავახიშვილი და ლიტერატურული სფეროს წარმომადგენლები ესწრებოდნენ.

საქართველოს ეროვნული სტენდის პრეზენტაცია გაიმართა ღონისძიებით - „ჰაგიოგრაფიიდან პოსტმოდერნიზმამდე“. მწერალთა სახლის სტენდის სტუმრებს, ქართული მწერლობის გაცნობასთან ერთად, საინტერესო კალიგრაფიულ აქტივობაში ჩართვის შესაძლებლობა ჰქონდათ. კალიგრაფმა გიორგი სისაურმა მათ ქართული ანბანით დაუწერა სასურველი სიტყვები, გამონათქვამები, ფრაზები, სახელები და ა. შ. ასევე გაიმართა ღონისძიება, სახელწოდებით, „თექვსმეტსაუკუნოვანი უწყვეტი ლიტერატურული პროცესი“, რომელიც განიხილავს ქართულ ლიტერატურას, ქართულ-ფრანგულ ლიტერატურულ ურთიერთობებსა და ქართული და ევროპული ლიტერატურის კავშირს.

პირველ საფესტივალო დღეს გამართულ პანელ-დისკუსიაში მონაწილეობა მიიღეს საქართველოს საგანგებო და სრულუფლებიანმა ელჩმა საფრანგეთის რესპუბლიკაში გოჩა ჯავახიშვილმა და ფრანგული ფილოლოგიის დოქტორმა, პროფესორმა, ივანე ჯავახიშვილის სახელობის თბილისის სახელმწიფო უნივერსიტეტის რომანული ფილოლოგიის ფაკულტეტის ხელმძღვანელმა ბელა ხაბეიშვილმა. შეხვედრას ასევე ესწრებოდნენ უცხოელი გამომცემლები, ლიტერატურული აგენტები, მედიის წარმომადგენლები და ქართული სათვისტომოს საპატიო წევრები.

ფესტივალის მსვლელობისას ქართულ სტენდზე დაგეგმილია არაერთი აქტივობა და საქმიანი შეხვედრა - PUBLISHERS MATCHMAKING. შეხვედრის მონაწილეები იქნებიან საქართველოს მწერალთა სახლი, ქართული გამომცემლობები: „სეზან ფაბლიშინგი“, „მედუზა,“ „ბაკმი“ და მთარგმნელები - მაია ვარსიმაშვილი და მაია გიორხელიძე. შეხვედრაზე განიხილავენ ქართული ლიტერატურის კატალოგს. მთარგმნელი დალი იაშვილი წარადგენს მიხეილ ჯავახიშვილის მოთხრობას - „ლამბალო და ყაშა“ და მოთხრობების კრებულს. მთავარ სცენაზე გაიმართება წიგნის - „მზე, მთვარე და პურის ყანა“ წარდგენა. წიგნს წარადგენენ ავტორი - მწერალი და კინორეჟისორი თემურ ბაბლუანი და ეროვნული კინოცენტრის წარმომადგენელი ევროპაში სოფიო ბაბლუანი. ქართველ გამომცემლებთან ერთად საქართველოს სტენდთან იქნებიან ფრანგული გამომცემლობები: LE CHERCHE MIDI, GINGKO, EDITIONS DES CARNETS DU DESSERT DE LUNE, MEDUZA, და იტალიური გამომცემლობა MODERN TIMES, რომლებიც წარმოადგენენ ფრანგულად თარგმნილ კლასიკურ და თანამედროვე ქართულ პროზასა და პოეზიას.

საქართველოს ეროვნულ სტენდზე წარმოდგენილი იქნება ბუკლეტი ქართველი ავტორების 50-ამდე ნამუშევრის სინოპსისითა და ამონაბეჭდებით ისეთი ცნობილი ნაწარმოებებიდან, როგორიც არის „შუშანიკის წამება“, „ვეფხისტყაოსანი“ და სხვა.

აღსანიშნავია, რომ პარიზის წიგნის ბაზრობა ევროპის ერთ-ერთი ყველაზე მნიშვნელოვანი კულტურული მოვლენაა, რომელიც ყოველწლიურად გაზაფხულზე იმართება და მასში მონაწილეობას 1 200 გამომცემელი და 2 000 ავტორი იღებს. საქართველოს წელს პირველად მიეცა საშუალება, საკუთარი სტენდით ჩაერთოს საფესტივალო აქტივობებში.

ფესტივალში ეროვნული სტენდით მონაწილეობა საქართველოსთვის ძალიან მნიშვნელოვანია.

საფესტივალო აქტივობები მწერალთა სახლს, ქართველ მწერლებსა თუ გამომცემლებს დაეხმარება ლიტერატურული ურთიერთობების წარმართვაში, ქართული მწერლობის პოპულარიზაციაში, ახალი კონტაქტების მოძიებასა და მთარგმნელობითი საქმიანობის ხელშეწყობაში.