,
მსოფლიო შევიდა ეპოქაში, რომელიც კვლავ ძალაუფლებითა და დიდი სახელმწიფოების პოლიტიკით ხასიათდება, ბოლო წლებში ვხედავთ მზარდ დაძაბულობასა და კონფლიქტებს მსოფლიოში, მათ შორის უკრაინის წინააღმდეგ რუსეთის აგრესიას, - ამის შესახებ გერმანიის კანცლერმა ფრიდრიხ მერცმა მიუნხენის უსაფრთხოების კონფერენციის გახსნაზე სიტყვით გამოსვლისას განაცხადა.
მისი თქმით, ძველი მსოფლიო წესრიგი აღარ არსებობს. ამ კონტექსტში გერმანიის კანცლერმა ისაუბრა რუსეთიდან და ჩინეთიდან მომდინარე საფრთხეების შესახებ.
„გლობალური წესრიგი, რომელიც უფლებებსა და წესებს ეფუძნებოდა, წარსულს ჩაბარდა. გადავკვეთეთ ეპოქის ზღვარი, რომელიც კვლავ ღიად ხასიათდება ძალაუფლებითა და დიდი სახელმწიფოების პოლიტიკით“, - აღნიშნა მერცმა.
მისი თქმით, გამოწვევების გადასალახად აშშ-ევროპის კავშირები უნდა გამოსწორდეს.
„დიდი სახელმწიფოების მეტოქეობის ეპოქაში, შეერთებული შტატებიც კი ვერ იქნება საკმარისად ძლიერი, რომ მარტო იმოქმედოს. ატლანტიკის ორივე მხარეს უნდა გავაცნობიეროთ, რომ ერთად უფრო ძლიერები ვართ. ასე რომ, მოდით ერთად აღვადგინოთ და გამოვაცოცხლოთ ტრანსატლანტიკური ნდობა“, - განაცხადა მერცმა.
მისი თქმით, თავისუფლება, რომლითაც ევროპის კონტინენტი მეორე მსოფლიო ომის შემდეგ სარგებლობს, „აღარ არის მოცემულობა“.
კანცლერმა მოუწოდა ევროპულ ქვეყნებს, გამოიჩინონ სიმტკიცე და მტკიცე გადაწყვეტილება ამ თავისუფლების დასამკვიდრებლად ჩინეთის, რუსეთის და შეერთებული შტატების მიერ მსოფლიო წესრიგისთვის შექმნილი გამოწვევების ფონზე.
„ეს მოითხოვს მზადყოფნას, ახალ დასაწყისებში, ცვლილებებში ჩასართავად. დიახ, ასევე მსხვერპლის გაღებაში. არა ოდესმე, არამედ ახლავე“, - აღნიშნა მერცმა.
მისივე თქმით, უნდა მოხდეს ევროპის უზარმაზარი გამოუყენებელი პოტენციალის სრულად რეალიზება, თუ ბლოკს სურს, გლობალურ გამოწვევებს გაუმკლავდეს.
მერცმა აღნიშნა, რომ მიუხედავად იმისა, რომ ევროკავშირის მთლიანი შიდა პროდუქტის მოცულობა 10-ჯერ აღემატება რუსეთის მთლიანი შიდა პროდუქტის მოცულობას, ბლოკის გლობალური გავლენა ამ მაჩვენებელს არ ასახავს.
„ჩვენი სამხედრო, პოლიტიკური, ეკონომიკური და ტექნოლოგიური პოტენციალი უზარმაზარია, მაგრამ ჩვენ დიდი ხანია არ გამოგვიყენებია ის საჭირო დონით. ამიტომ ყველაზე მნიშვნელოვანია, რომ ახლა ჩვენს გონებაში გადართვა მოვახდინოთ“, - აღნიშნა მერცმა.
ამასთან, გერმანიის კანცლერმა განაცხადა, რომ ევროკავშირში მეტი ქვეყნის გასაწევრიანებლად ახალი სტრატეგიის შემუშავებაა საჭირო.
მერცმა უპასუხა მონტენეგროს პრეზიდენტის, იაკოვ მილატოვიჩის კითხვას, შეძლებს თუ არა ევროკავშირის გაფართოება ევროპის გლობალური კონკურენტუნარიანობის გაზრდას.
„დიახ. ჩვენ ბევრ ქვეყანას დავპირდით ევროკავშირში გაწევრიანებას და გულწრფელად რომ ვთქვა, სულ უფრო და უფრო არაკომფორტულად ვგრძნობ თავს თქვენი ქვეყნების მიმართ ჩვენი მიდგომით. არ მინდა თქვენი დაკარგვა. თქვენ ევროპის კონტინენტის ნაწილი ხართ და შესაბამისად, პოტენციურად ევროკავშირის ნაწილიც ხართ“, - აღნიშნა მერცმა.
მისი თქმით, იმედოვნებს, რომ აპრილში შემდგომი ნაბიჯები გადაიდგმება, რათა ისეთი ქვეყნები, როგორიცაა მონტენეგრო, „ბოლოს და ბოლოს ევროკავშირს უფრო დაუახლოვდნენ“.
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
