,
ირანის ხელისუფლებამ უპრეცედენტო გვალვის ფონზე ღრუბლების დათესვის პროცესი დაიწყო, რა დროსაც წვიმის ხელოვნურად გამოწვევის მიზნით რეაგენტების გაფრქვევა ხდება. კერძოდ, თვითმფრინავიდან ან მიწიდან ღრუბლებში ვერცხლისა ან კალიუმის იოდიდი შეჰყავთ, რაც წყლის ორთქლის კონდენსაციას და შემდგომში ნალექის მოსვლას აჩქარებს.
შაბათს, ეს პროცესი მარილიანი ურმიის ტბის თავზე განხორციელდა, შემდეგ პროცესი აზერბაიჯანთან საზღვარზე მდებარე პროვინციებში გაგრძელდება.
ირანის მეტეოროლოგიური ორგანიზაციის მონაცემებით, წელს ქვეყანაში ნალექის რაოდენობა მრავალწლიან საშუალო მაჩვენებელზე 89%-ით ნაკლებია.
დედაქალაქ თეირანში, სადაც 9 მილიონზე მეტი ადამიანი ცხოვრობს, წყალსაცავებში მარაგი 10%-ზე დაბალია. ხელისუფლება არ გამორიცხავს წყლის მიწოდების შეზღუდვას, ხოლო პრეზიდენტმა მასუდ ფეზეშქიანმა არც მოსახლეობის ევაკუაცია გამორიცხა.
დონალდ ტრამპმა რუსეთსა და უკრაინას შორის „სამშვიდობო გეგმას“ მხარი დაუჭირა, - ინფორმაციას NBC News-ი აშშ-ის პრეზიდენტის ადმინისტრაციის მაღალჩინოსანზე დაყრდნობით ავრცელებს.
გამოცემის ცნობით, აშშ-ის პრეზიდენტმა, დონალდ ტრამპმა მხარი დაუჭირა რუსეთსა და უკრაინას შორის ომის დასრულების მიზნით შემუშავებულ 28-პუნქტიან „სამშვიდობო გეგმას“, რომელზეც ამერიკელი მაღალჩინოსნები რუსეთის პრეზიდენტის სპეციალურ წარმომადგენელთან, კირილ დმიტრიევთან და უკრაინელ ოფიციალურ პირებთან ბოლო რამდენიმე კვირის განმავლობაში ფარულად მუშაობდნენ.
როგორც გამოცემა წერს, აშშ-ის მხრიდან გეგმაზე პრეზიდენტის სპეციალური წარმომადგენელი სტივ უიტკოფი, ვიცე-პრეზიდენტი ჯეი დი ვენსი, სახელმწიფო მდივანი მარკო რუბიო და დონალდ ტრამპის სიძე ჯარედ კუშნერი მუშაობდნენ.
„გეგმა მდგრადი მშვიდობის მიღწევის მიზნით ორივე მხარისთვის უსაფრთხოების გარანტიებს ითვალისწინებს. გეგმა იმას შეიცავს, რაც უკრაინას სურს და მდგრადი მშვიდობისთვის სჭირდება“, - განუცხადა გამოცემას ამერიკელმა მაღალჩინოსანმა.
ამერიკელმა ოფიციალურმა პირმა გამოცემასთან გეგმის დეტალებზე არ ისაუბრა და აღნიშნა, რომ პროცესში ჩართულ მხარეებთან გეგმასთან დაკავშირებით მოლაპარაკებები ჯერ კიდევ აუცილებელია.
ამასთან, გამოცემის ინფორმაციით, გეგმის ჩარჩო უკრაინულ მხარეს უნდა წარუდგინონ და პროექტის შესახებ საბოლოო შეთანხმების ვადა უკრაინაში პენტაგონის დელეგაციის ვიზიტს ემთხვევა.
გამოცემის წყაროს თქმით, უკრაინაში პენტაგონის დელეგაციის ვიზიტი „სამშვიდობო მოლაპარაკებების განახლების“ მიზნით თეთრი სახლის გეგმის ნაწილია.
