საქართველოს კულტურისა და სპორტის სამინისტროს ხელშეწყობით პოლონეთში, ქალაქ კრაკოვის „გროტესკას თეატრში“, მოხეტიალე მთვარის თეატრმა წარმოადგინა ნიკო ფიროსმანის ცხოვრებისა და შემოქმედების მიხედვით დადგმული თოჯინური სპექტაკლი „ფიროსმანი“. სპექტაკლი კრაკოვში მიმდინარე ქართული კულტურისა და ისტორიისადმი მიძღვნილი უპრეცედენტოდ მასშტაბური გამოფენის - „ოქროს საწმისი – საქართველოს ხელოვნება“ - ფარგლებში გაიმართა. გამოფენა კრაკოვის ეროვნულ მუზეუმში 18 აპრილს გაიხსნა, რომელიც ევროპელ დამთვალიერებელს საქართველოს მდიდარ კულტურას, ქართული ხელოვნების შედევრებს, ყოფის ამსახველ და საბრძოლო ხელოვნების გამორჩეულ ნიმუშებს აცნობს. გამოფენა 2024 წლის 15 სექტემბრამდე გაგრძელდება.
კერძო თეატრმა ამ სპექტაკლით ევროპელ მაყურებელს გენიალური ქართველი მხატვრის ცხოვრება და შემოქმედება და ქართული კულტურული ღირებულებები გააცნო.
პიესის ავტორი, წარმოდგენის მუსიკალურად გამფორმებელი და რეჟისორია ნიკა ლუარსაბიშვილი, სცენოგრაფები არიან ნინო კიტია და ირინე ყველიაშვილი, მეთოჯინეები - გიორგი თოთაძე, ლელა ხაჩატუროვი, ლევან ბაიდაური, ნინო კოტაშვილი, ნიკოლოზ მჭედლიშვილი, ნიკალაი ამოევი, ნანიშა მეტრეველი, ლუკა ჭულუხაძე.
სპექტაკლს ახმოვანებენ: ლევან წულაძე (არქივარიუსი), გია კიტია (მეეზოვე), არჩილ სულაქველიძე (ნიკო ფიროსმანი), ნიკოლოზ ღუღუნიშვილი (პატარა ნიკო), მარი კიტია (ნიკო ფიროსმანის დედა), ნანიშა მეტრეველი (ელისაბედი), ალექსანდრე კვეზერელი (ლადო ), ნიკა ლუარსაბიშვილი (დიმიტრა), მარიამ გულაშვილი (მარგარიტა), ჯეჯი სხირტლაძე (ქალანთაროვები, რკინიგზისა და კაფე შანტანის დირექტორი).
„ფიროსმანი“ კულტურის სამინისტროს კონკურსის - „პროფესიული თეატრების შემოქმედებითი საქმიანობის ხელშეწყობა სადადგმო ან სხვა ხარჯით“ - ერთ-ერთი გამარჯვებული პროექტია.
