,
აშშ-ის პრეზიდენტი დონალდ ტრამპი ირანთან დაკავშირებით აშშ-ის მოსახლეობას მიმართავს, - ინფორმაციას თეთრი სახლის პრესსპიკერი, კეროლაინ ლევიტი ავრცელებს.
„ხვალ საღამოს 9 საათზე (თბილისის დროით ხუთშაბათი, 5:00 საათი), პრეზიდენტი ტრამპი ერს მიმართავს, რათა მათ მნიშვნელოვანი სიახლე გააცნოს“, - წერს ლევიტი X-ზე.
მანამდე, აშშ-ის პრეზიდენტმა, დონალდ ტრამპმა თეთრ სახლში ჟურნალისტებს განუცხადა, რომ ირანის წინააღმდეგ ომი, ძალიან მალე დასრულდება.
„ძალიან მალე დავტოვებთ. ვიტყოდი, რომ შესაძლოა ორ კვირაში. ორ კვირაში, შესაძლოა სამ კვირაში. რეჟიმის შეცვლა მოგვიწია. რეჟიმის შეცვლა არ იყო ერთ-ერთი იმ მიზნებს შორის, რაც მე მქონდა. მე მქონდა ერთი მიზანი: მათ არ ჰქონოდათ ბირთვული იარაღი და ეს მიზანი მიღწეულია. მათ არ ექნებათ ბირთვული იარაღი. მაგრამ ვასრულებთ სამუშაოს და ვფიქრობ, შესაძლოა ორ კვირაში, შესაძლოა კიდევ რამდენიმე დღეში, შევასრულოთ ეს სამუშაო. მაგრამ გვინდა, რომ გავანადგუროთ ყველაფერი, რაც მათ აქვთ“, - განაცხადა ტრამპმა.
ირანის საგარეო საქმეთა მინისტრმა, აბას არაღჩიმ განაცხადა, რომ ის აშშ-ის პრეზიდენტის სპეციალურ წარმომადგენელთან, სტივ უიტკოფთან ომის დასრულების საკითხებზე პირდაპირ მოლაპარაკებებს აწარმოებს.
მისი თქმით, ის უიტკოფისგან მოკლეტექსტურ შეტყობინებებს იღებს. ისინი აზრთა გაცვლით არიან დაკავებულნი, თუმცა მოლაპარაკებებს არ აწარმოებენ. ყველა შეტყობინება საგარეო საქმეთა სამინისტროს გავლით იგზავნება.
მან აგრეთვე აღნიშნა, რომ ირანს აშშ-ის 15-პუნქტიან გეგმაზე ჯერ არ უპასუხია.
„ჩვენ 15 ამერიკულ წინადადებაზე არავითარი პასუხი არ გაგვიგზავნია. ჩვენ აგრეთვე არავითარი წინადადებები ან პირობები არ წარმოგვიდგენია“, - თქვა არაღჩიმ.
როგორც არაღჩიმ დასძინა, ირანისთვის ომის დასრულების პირობები ნათელია. თეირანს არა ცეცხლის შეწყვეტა, არამედ ომის სრული დასრულება სურს, როგორც ირანში, აგრეთვე მთელ რეგიონში.
თეირანს აგრეთვე სურს მიიღოს გარანტია, რომ მასზე თავდასხმა არ განმეორდება და მას მიყენებული ზიანის ასანაზღაურებლად კომპენსაციას გადაუხდიან.
