USD 2.7118
EUR 3.1568
RUB 3.4534
Тбилиси
ისრაელმა ერთი წლის განმავლობაში "ჰეზბოლას" მთელი სამხედრო და პოლიტიკური ელიტა გაანადგურა - გიორგი კობერიძე
дата:  1539
ისრაელმა ერთი წლის განმავლობაში "ჰეზბოლას" მთელი სამხედრო და პოლიტიკური ელიტა გაანადგურა. გუშინდელი საჰაერო იერიში ჰეზბოლას მეთაურების თითქმის სრული განეიტრალებით დასრულდა. მანამდე კი პეიჯერების აფეთქებითა და დამიზნებითი მკვლელობებით საშუალო და ქვედა რგოლი გამოეთიშა პროცესს.
ნასრალას ჰეზბოლას ხელმძღვანელი 1992 წლიდან ხდება, მას შემდეგ რაც მისი წინამორბედი, აბას ალ მუსავი საავიაციო დარტყმით მოკლეს. მაგრამ ნასრალას წონა და და გავლენები განსაკუთრებით დიდი იყო, განსაკუთრებით მას შემდეგ რაც 2000 წელს ისრაელმა სამხრეთ ლიბანი დატოვა (1985 წლიდან ჰქონდა დაკავებული), ხოლო 2006 წელს ჰეზბოლას სრული დამარცხება ისრაელმა ვერ შეძლო. ნასრალამ ჰეზბოლა რეგიონის ერთ-ერთ ყველაზე გავლენიან ტერორისტულ ორგანიზაციად აქცია, სამხრეთ და აღმოსავლეთ ლიბანის კონტროლი მოიპოვა და ირანის თანხმობით შექმნა სამხედრო პლაცდარმები სირიაში, ერაყსა და იემენში. პრაქტიკულად ჰეზბოლა იქცა ბევრად უფრო ანგარიშგასაწევ ძალად, ვიდრე თავად ლიბანის არმია იყო. სწორედ ჰეზბოლას დახმარებით გადარჩა სირიის დიქტატორი ბაშარ ალ ასადი დამხობას. ჯერ კიდევ რუსეთის ჩარევამდე.
ნასრალა განსაკუთრებით დიდ მნიშვნელობას ანიჭებდა საინფორმაციო და მედია კამპანიას და თავის ირგვლივ ქარიზმის შექმნას. მან ეს ყველაფერი წლების განმავლობაში წარმატებით შეძლო. ლიბანში პრესის მნიშვნელოვანი ნაწილი სწორედ ჰეზბოლას მიერ იყო კონტროლირებადი.
ნასრალამ ჰეზბოლას ლეგიტიმაცია მოახერხა ლიბანში. მისმა გავლენებმა ლიბანის პოლიტიკის ყოველდღიურ წარმართვაზე მნიშვნელოვანი კვალი დატოვა. პრაქტიკულად მთავრობის წარმომადგენლების არჩევა ჰეზბოლას თანხმობის გარეშე ვერ ხერხდებოდა.
ჰეზბოლა პოლიტიკურ მოწინააღმდეგეებს პირდაპირ ანადგურებდა. 2005 წელს მათ ქვეყნის ყოფილი პრემიერიც კი მოკლეს. ჰეზბოლას მანამდე განხორციელებული აქვს ფრანგულ და ამერიკულ ბაზებზე ტერორისტული თავდასხმა, აშშ-ს საელჩოზე თავდასხმა, ბუენოს აიერესში ისრაელის საელჩოზე თავდასხმა, ბულგარეთში, ბურგასის აეროპორტზე თავდასხმა და სხვა დანაშაულები, მათ შორის ათობით ადამიანის გატაცება, მკვლელობა, იარაღით ვაჭრობა და სხვა.
ერთი წლის განმავლობაში 11 ათასი რაკეტა და დრონი ისროლა ჰეზბოლამ ისრაელის წინააღმდეგ სამხრეთ ლიბანიდან. ამ ფონზე ისრაელის მხრიდან ნასრალას როგორც უნარიანი ლიდერისა და მისი საკომუნიკაციო ქსელის განადგურება ჰეზბოლას ბრძოლისუნარიანობას კრიტიკულად ამცირებს.
ისრაელს გადაწყვეტილი აქვს მისი ორი მთავარი მეტოქე, 1. ჰამასი მაქსიმალურად გაანეიტრალოს და როგორც საფრთხე გრძელვადიანად გააქროს; 2. ჰეზბოლა ბრძოლისუნარიანობა მინიმუმამდე დაუქვეითოს და სამხრეთ ლიბანში საცეცხლე პოზიციები გაუნადგუროს. ჰეზბოლა ირანის მთავარი დასაყრდენი ძალაა რეგიონში. ირანსა და ლიბანის შიიტურ ნაწილში გლოვაა გამოცხადებული. მაგრამ ნასრალას მკლელობა სირიის სუნიტურ ნაწილში ზეიმით აღნიშნეს. ასევე ფარულად იზეიმა მოსახლეობის ნაწილმა ირანშიც. თუმცა ოფიციალური თეირანი კვლავ იმუქრება შურისძიებით, მაგრამ ჰამასის ლიდერის, ისმაილ ჰანიეს მკვლელობაზე პასუხგაუცემლობამ თეირანის გავლენები შეამცირა.
ახლა არაა გამორიცხული ისრაელმა ჰეზბოლას სამხედრო ობიექტების წინააღმდეგ კიდევ უფრო აქტიური საავიაციო კამპანია წამოიწყოს, სანამ რაიმე მოლაპარაკებაზე იქნება საუბარი. ეს ყველაფერი იმ ფონზე უფრო რეალისტურია, რომ ახლა ჰეზბოლას შიგნით ქაოსი და გაურკვევლობაა, საკომუნიკაციო ქსელი კი დაქვეითებული. არც სახმელეთო ოპერაციის ჩატარება ჩანს გამორიცხული. ეს მაშინ განხორციელდება თუკი ჰეზბოლას საცეცხლე წერტილების განადგურება და მისი ბრძოლისუნარიანობის მაქსიმალური დაქვეითება საავიაციო დარტყმებით ვერ მოხერხდა. მაგრამ ისრაელის მიზანი ჰეზბოლას იძულებაა შეწყვიტოს ისრაელის წინააღმდეგ ცეცხლი, ხოლო გრძელვადიანად, გამოეთიშოს ისრაელის წინააღმდეგ შემდგომ საბრძოლო მოქმედებებს. ისრაელი ფიქრობს რომ ამ ყველაფრის მიღწევა ან ინტენსიური დაბომბვის კამპანიით მიღწევა ან სახმელეთო ოპერაციითა და ჰეზბოლას ფაქტობრივი განადგურებით / კაპიტულაციით.
аналитика
კრემლს ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - გიორგი კობერიძე
დღევანდელი რუსული ბეჭდური პრესა ივლისის თვეში ეკონომიკური ვითარების დამძიმებაზე საუბრობს - რაც რუსეთის დახურული სისტემის პირობებში საკმაოდ იშვიათი მოვლენაა. გაზეთები აღნიშნავენ, რომ: საშუალოდ 12%-ით მოხდა რუსეთში კომუნალურები გადასახადების ზრდა. გაძვირდა პურის ფასიც, არადა ხორბლის ფასი გაიაფდა. მშენებლობის ბიზნესი დაეცა და ქარხნები იხურება.
 
მიზეზი? მუშახელის კატასტროფული დეფიციტი ბაზარზე, რასაც ადამიანური რესურსების კლების ხარჯზე ემატება მოთხოვნის ბუნებრივი შემცირება - რუსების ნაწილი ფრონტზე კვდება, ნაწილი კი ქვეყნიდან გარბის. დარჩენილი კვალიფიციური მუშახელი კი სამხედრო ინდუსტრიაშია მობილიზებული. იაფ ხორბალს რუსეთი თავის მოკავშირეებს საბითუმო ფასებში ყიდის, ხოლო ბაზარზე შემოსავლის შესანარჩუნებლად კრემლთან დაახლოებული პურის მსხვილი მეწარმეები მის ფასს ზრდიან.
 
ამას კი ემატება სანქციები. დღეს ევროპის მხრიდან სანქციების მე-18 პაკეტი დამტკიცდა, რომელიც რუსეთის ნავთობისა და გაზის ინდუსტრიას ურტყამს. 47.6 დოლარი - ესაა ის თანხა, რომელზე ძვირადაც ნავთობს არ შეიძენს ევროკავშირი და ბრიტანეთი რუსეთისაგან, რომელსაც გათვლა 60 დოლარზე ჰქონდა. კრემლს რომ მყარი მოგება ჰქონდეს 70 დოლარად უნდა ჰყიდდეს ბარელს. სანქციების მიხედვით ნორდ სტრიმების გაზსადენები აღარ ამუშავდება. ამას ემატება რუსულ ჩრდილოვან ფლოტზე დევნაც, რომელიც სხვა ქვეყნების დროშის ქვეშ მცურავი ხომალდების დახმარებით ცდილობდა რუსული ნავთობის ევროპაში გაყიდვას და სანქციების გვერდის ავლას.
 
ამ ფონზე მნიშვნელოვანია ისიც, რომ რუსეთში ტოტალიტარული მმართველობა კიდევ უფრო უჭერს მოსახლეობას: ქვეყანაში 5500 აკრძალული საიტი, მუსიკა, საინფორმაციო საშუალება, კოდური სიტყვა, ფილმი და გამოთქმაა, რისი მოძიებაცა და ნახვაც არ შეიძლება, მათ შორის არც VPN-ის გამოყენებით. თუ ნახავ ჯერ დაგაჯარიმებენ, შემდეგ ჯერზე კი პასუხისგებაში მისცემენ შენს თავს.
 
მზარდი ინფლაციისა და ძირითადი რესურსების სამხედრო წარმოებასა თუ ფრონტზე მობილიზების ფონზე ეკონომიკური პერსპექტივა კარგად არ გამოიყურება. არსებობს ვარაუდი, რომ გვიანი შემოდგომიდან რუსეთი კიდევ უფრო მეტი ბანკნოტების დაბეჭდვას აპირებს.
 
მუშახელის დეფიციტის ფონზე ინდური პრესა საუბრობდა პოტენციურ გეგმაზე, რომლის მიხედვითაც რუსეთი წლის ბოლომდე მილიონი ინდოელი მუშახელის რეკრუტირებას აპირებს, თუმცა ამ ამბავმა რუსეთში დადებითი რეაქცია არ გამოიწვია, რის გამოც რუსეთის შრომის მინისტრმა აღნიშნული ინფორმაცია უარყო. მიუხედავად ამისა, მარტო წელს რუსეთში 71,817 ინდოეთის მოქალაქეზე გაიცა ოფიციალური სამუშაო ნებართვა. ეს რაც ლეგალურად ჩანს, და რაც არა ის კიდევ სხვაა. ინდოელების გარდა რუსეთში დიდი რაოდენობით არიან შუა აზიელები და ჩინელები.
 
ამ ვითარებაში ფრონტზე რუსეთის ვითარება არასახარბიელოა. დონეცკის მონაკვეთზე მომარაგების გზას უკვე ეწოდა "სიკვდილის ხაზი", სადაც უკრაინული დრონები ყველაფერს ბომბავენ რაც კი გადაადგილდება. მიუხედავად ამისა, რუსეთი არ წყვეტს ცოცხალი ძალის მობილიზებას და დონეცკის ოლქის დასავლეთ ნაწილში, პოკროვსკის სექტორზე დაწოლას. რუსეთის მხრიდან ყველა გათვლა ისეთი იყო, რომ პოკროვკი ჯერ 2024 წლის ბოლომდე უნდა აეღოთ, შემდეგ 2025 წლის მარტამდე, ახალი თარიღი 2025 წლის 9 მაისი იყო, შემდეგ კი ამ სექტორზე დაწყებული შეტევის ერთი წლის თავი, ანუ ივლისი. მაგრამ ერთი წლის თავზე რუსები ჯერ კიდევ არ არიან ქალაქის ფარგლებში შესულები. ზოგადად პოკროვკისაკენ გაჭრას რუსები 2024 წლის თებერვლიდან ცდილობენ, ავდიივკას დაცემის შემდეგ.
 
დასავლური მედია ამბობს, რომ რუსული ზაფხულის შეტევის მხოლოდ პირველი ფაზა ვიხილეთ ჯერ და რომ მეორე ფაზა ჯერ კიდევ წინააო. ისინი 150 ათას დამატებით რუს, კორეელ და სხვა ქვეყნებიდან დაქირავებულ სამხედროებზე საუბრობენ და ახალი მიმართულებით გაჭრას არ გამორიცხავენ, ან ძველ სექტორებზე მათ გადანაწილებასა და უკრაინულ პოზიციებზე დაწოლის გაძლიერებას.
 
კრემლი ტრამპის მიერ მიცემულ 50 დღიან ვადას მაქსიმალური შეტევისათვის გამოიყენებს და ამაში უცნაური არაფერია. მთავარია რამხელა იქნება მსხვერპლი და გამოფიტვა. როგორც ამერიკის სახელმწიფო მდივანმა აღნიშნა, მხოლოდ წელს რუსეთს 100 ათასი მოკლული ჰყავს. მან ხაზი გაუსვა ფაქტს, რომ საუბარია მოკლულ სამხედროებზე და არა დაჭრილებზე, დაშავებულებზე ან ტყვეებზე. რუსეთი წლებია იმით პოზიციონირებს, რომ თითქოს ბოლო სამხედრომდე და ბოლო საკვებამდე შეუძლია იომოს. ასეთი რამ არცერთ სახელმწიფოს არ შეუძლია, მაგრამ კრემლს რომ ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - ეს უკვე ვნახეთ. და ისიც ნათელია, რომ ახლა ომს სერიოზული გამოფიტვის სახე აქვს მიღებული, რის გამოც დამატებითი მოთამაშეებისა და სახელმწიფოების ირიბი ჩართვა კიდევ უფრო მზარდია.
 
პუტინმა ისიც კარგად იცის, რომ ომის შეწყვეტა სხვა მიზეზითაცაა საშიში - ამდენი სამხედროსა და ციხეებიდან გამოსული, თუ მობილიზებული კრიმინალის რესოციალიზაცია ძალიან რთული იქნება, მით უფრო გართულებული ეკონომიკური ვითარებიდან გამომდინარე. თუმცა ყველაფერს აქვს თავისი ზედა ზღვარი - ეკონომიკის გამძლეობასაც, მსხვერპლის რაოდენობასაც და გამარჯვების რწმენასაც.
 
более
голосование
ვინ გაიმარჯვებს რუსეთ - უკრაინის ომში?
голосование
Кстати