,
აშშ-ის ვიცე-პრეზიდენტმა ჯეი დი ვენსმა განაცხადა, რომ დიდად გაკვირვებული არ არის უნგრეთის პრემიერ-მინისტრ ვიქტორ ორბანის დამარცხებით. მისი თქმით, გასულ კვირას ბუდაპეშტში ავტოკრატთან ერთად კამპანიის წარმოების გადაწყვეტილება ერთგული მოკავშირის მხარდაჭერას ისახავდა მიზნად.
„ჩვენ არ წავედით იმიტომ, რომ ველოდით, ვიქტორ ორბანი არჩევნებში გამარჯვებას მიაღწევდა. ჩვენ წავედით იმიტომ, რომ სწორი იყო იმ ადამიანის მხარდაჭერა, რომელიც ძალიან დიდი ხნის განმავლობაში ჩვენს გვერდით იდგა.
მისი მემკვიდრეობა უნგრეთში ტრანსფორმაციული ხასიათისაა — 16 წელი, რომელმაც ფუნდამენტურად შეცვალა ეს ქვეყანა.
ჩვენ ნამდვილად ვიცოდით, რომ ვიქტორს არჩევნებში წაგების დიდი შანსი ჰქონდა. ჩვენ ეს იმიტომ გავაკეთეთ [ჩავედით უნგრეთში], რომ ის ერთ-ერთია იმ მცირერიცხოვან ევროპელ ლიდერთაგან, ვინც ბრიუსელში ბიუროკრატიას დაუპირისპირდა“, - განაცხადა ვენსმა Fox News-თან ინტერვიუში.
ევროკომისიამ ვიქტორ ორბანის მმართველობის პერიოდში გაყინული 35 მილიარდი ევროს განბლოკვის მიზნით პიტერ მადიარს 27 პირობა წაუყენა, - ინფორმაციას Financial Times-ი ავრცელებს.
გამოცემის ინფორმაციით, უნგრეთის საპარლამენტო არჩევნებში გამარჯვების შემდეგ ევროკომისიამ პიტერ მადიარის პარტია „ტისასთან“ მოლაპარაკებები უკვე დაიწყო.
ევროკომისიის მიერ წამოყენებულ პირობებს შორის უნგრეთის მიერ რეფორმების განხორციელება და უკრაინასთან ურთიერთობების გაუმჯობესება შედის.
ევროპელი დიპლომატების განცხადებით, ევროკავშირის წევრი სახელმწიფოები ელიან, რომ პიტერ მადიარის მთავრობა ვიქტორ ორბანის მიერ უკრაინისთვის 90 მილიარდი ევროს სესხის გამოყოფასა და რუსეთის წინააღმდეგ სანქციების ახალ პაკეტზე დაწესებულ ვეტოს მოხსნის.
ასევე, ევროკომისიის წარმომადგენლის ცნობით, 35 მილიარდი ევრო გაყინულია უნგრეთის მოქმედი პრემიერ-მინისტრის ვიქტორ ორბანის მიერ აუცილებელ რეფორმებზე უარის, ასევე, კანონის უზენაესობის დარღვევისა და კორუფციის გაზრდის გამო.
გამოცემა წერს, რომ გაყინული თანხების განბლოკვის მიზნით უნგრეთის ახალ მთავრობას ისეთი წარსული გადაწყვეტილებების გაუქმება მოუწევს, რომლებსაც ევროკავშირი მისი წესების დარღვევად მიიჩნევს.
